MALCAAMAD

Malcaamadani waa barnaamij kheyri ah, oo aan dheef-adduun laga doonaynin, ujeedada loo sameeyayna ay tahay:

• - Markii aanu aragnay Internet-ka iyo casharada / duruusta aadka u faa'iidada badan ee ku jira, ee ay dhigayaan culimadii iyo aqoonyahankii soomaaliyeed intii u mudnayd...
• - Markii aanu aragnay dad badan oo soomaaliyeed, oo aad u isticmaala internet-ka, iyaga oo wakhti badan ku lumiya daawasho aan waxba uga soo kordhaynin, waliba dadkaasi ay u badan yihiin dhallinyar...
• - Waxaanu markaasi garannay in ay haboon tahay, in dadkaasi looga faa'iideeyo wakhtiga, oo aanu sameynno barnaamijkani oo aanu ugu talo-galnay, in muslimiinta Soomaaliyeed ka faa'iideystaan, oo ay diintooda wanaagsan ku bartaan habkan casriga ah, iyaga oo wax ka dhiganaya culimadooda wanaagsan, ee khayrka la jecel.

Waxa noo qorsheysan Inshaaa Allaah mustaqbalka dhaw in aanu diyaarino casharo dhameystiran oo toos(Online) iyo duubniinba(Offline) ku baxaya, si muslimiinta soomaaliyeed diintooda wanaagsan ugu helaan hab walba, markaa ka sii faa'iideysta casharadani aanu idiinka soo xulnay YouTube Channels-ka...

Waxa aanu sida oo kale idinku baraarujinaynaa Casharada ama Kutubta ku jira malcaamadani annagu maanu sameynin, mana aanu diyaarinin, laakiin waanu soo kala xulnay, una kala habeynay qaybihii ay barashada diintu ka koobnayd.

Hadaba casharadani ama kutubtani duuban waxa aanu ka soo qaadanay channel-lo ay dad soomaaliyeed oo khayr badani soo geliyeen meelaha ay ku leeyihiin barta youtube, taa macnaheedu maaha  In aanu ku xadgudubnay xuquuqdii channel-daasi iyo duruustaasi ay wakhtiga geliyeen:

• - Marka hore waxba kumaanu darin video-yadooda, waxna kamaanu jarin...
• - Marka xiga maanu download-gareysanin video-yadooda...
• - Hadaba hadii channel-ladaasi yihiin ajar-doon Iyo hadii ay yihiin hits-doon ama lacag-doonba, waxa aanu annagu sameynay waa sharing ama baahin, marka video-ga laga dhex shido halkani ama malcaamaddani, waxa daawashadaasi u tirsameysaa channel-kii lahaa video-gaasi...

Hadaba hadii ay dhacdo in channels-kaasi qaarkood dhibsadaan baahintani, ama u arkaan xadgudub, fadlan fariin noogu soo dir qaybta fariimaha, sida u dhakhsaha badan ayaanu uga saari doonnaa baahintaasi...